ဇာတ်လမ်းအကျဉ်း ဒူဘိုင်းကနေ လန်ဒန်ကို ပျံသန်းမယ့် ၇နာရီကြာ ခရီးစဉ်အတွက် စိတ်လှုပ်ရှား ပျော်ရွှင်နေသူ ခရီးသည်တွေကြား ကိုယ်စီအကြံတွေနဲ့ မသမာသူ လူတစ်စုရှိနေခဲ့ပါတယ်။ သူတို့ရဲ့နဂိုအကြံအစည်ကတော့ လေယာဉ်ထွက်ပြီး ၃နာရီအကြာမှ လှုပ်ရှားဖို့ဖြစ်ပေမယ့် မမျှော်လင့်တဲ့အခြေအနေတစ်ခုကြောင့် ခန့်မှန်းချိန်ထက် စောပြီး လှုပ်ရှားရဖို့ ဖြစ်သွားပါတော့တယ်။ ရုတ်တရက်ကြီး ဝရုန်းသုန်းကားတွေဖြစ်၊ ထင်မထားတဲ့ အခြေအနေကြောင့် အားလုံးက ထူပူနေကြတဲ့အချိန်မှာပဲ ခရီးသည်တွေထဲက လူတစ်ယောက်က တည်တည်ငြိမ်ငြိမ်နဲ့ ပြန်ပေးသမားတွေကိုစကားဆိုလာတာကတော့ “သူလည်း ကူညီပါမယ်တဲ့”။ ပြန်ပေးသမားတွေလည်း အံ့ဩ၊ ခရီးသည်တွေပါ အံ့ဩသွားရလောက်အောင် ကူညီပေးမယ်လို့ ပြောလာသူကတော့ ဆမ်ဖြစ်ပြီး သူကတကယ်တမ်းတော့ စေ့စပ်ညှိနှိုင်းရေးသမား တစ်ဦးပဲဖြစ်ပါတယ်။ ဒါပေမယ့် သူက သူကမ်းလှမ်းသလို တကယ်ပဲ ပြန်ပေးသမားတွေကို ကူညီပေးမှာလား။ တစ်ဖက်လှည့်နဲ့ သိမ်းသွင်းပြီး ခရီးသည်တွေကယ်ဆယ်ပေးမှာလား။ ပြန်ပေးသမားတွေကရော ဘာလို့ လေယာဉ်ကို ပြန်ပေးဆွဲခဲ့တာလဲ။ သူတို့ရဲ့ ရည်ရွယ်ချက်ပဲ အထမြောက် အောင်မြင်သွားမလား၊ ဒါမှမဟုတ် ခရီးသည်တွေပဲ အသက်ဘေးကနေအေးအေးဆေးဆေး လွတ်ကင်းသွားနိုင်မလား ဆိုတာကိုတော့ လေယာဉ်ပြန်ပေးဆွဲကားတို့ရဲ့ ထုံးစံအတိုင်း ထင်သလောက် မရိုးရှင်းတဲ့ လှည့်ကွက်တွေနဲ့ ရင်တထိတ်ထိတ်၊ အသည်းတယားယားရှုစားလိုက်ကြပါဦးနော်။