Lucky (Anya Taylor-Joy) ဟာ ငယ်ဘဝကတည်းက ကျင်လည်ခဲ့ရတဲ့ ဒုစရိုက်လောကကြီးကို စွန့်ခွာပြီး ဘဝသစ်တစ်ခုကို အေးအေးချမ်းချမ်း စတင်ဖို့ ကြိုးစားနေတဲ့ အမျိုးသမီးငယ်တစ်ဦးပါ။သို့သော်လည်း ဒေါ်လာသန်းပေါင်းများစွာ တန်ကြေးရှိတဲ့ ကိစ္စကြီးတစ်ခုကို လုပ်ဆောင်ရာမှာ မထင်မှတ်ဘဲ လွဲချော်သွားတဲ့အခါမှာတော့ သူဟာ လွတ်မြောက်ဖို့အတွက် အသက်လုပြီးထွက်ပြေးရပါတော့တယ်။တစ်ဖက်မှာ FBI ရဲ့ အပြင်းအထန် လိုက်လံဖမ်းဆီးမှုတွေအပြင်၊ အခြားတစ်ဖက်မှာလည်း ရက်စက်ကြမ်းကြုတ်တဲ့ မာဖီးယားဂိုဏ်းခေါင်းဆောင် Priscilla Matheson (Annette Bening) ရဲ့ရန်ကနေ လွတ်မြောက်ဖို့အတွက် Lucky ဟာ သူမစွန့်လွှတ်ခဲ့တဲ့ အတိတ်က ဒုစရိုက်ပညာရပ်တွေကို နောက်ဆုံးအနေနဲ့ ပြန်လည်အသုံးပြုရပါတော့တယ်။ သူမရဲ့ အသက်ရှင်သန်ရေးနဲ့အတိတ်ကနေ အပြီးတိုင် လွတ်မြောက်ရာလမ်းကို ဘယ်လိုရှာဖွေမလဲဆိုတာကို အချိုးအကွေ့များစွာနဲ့ သည်းထိတ်ရင်ဖိုစရာ ကြည့်ရှုရမှာ ဖြစ်ပါတယ်။The Queen's Gambit နဲ့ The Menu တို့လို ဇာတ်ကားတွေမှာ သရုပ်ဆောင်ကောင်းလွန်းလို့ နာမည်ကြီးတဲ့ မင်းသမီးချော Anya Taylor-Joy က အဓိကဇာတ်ဆောင်အဖြစ် ပါဝင်ထားသလို၊ကိုယ်တိုင်လည်း Executive Producer အနေနဲ့ ပါဝင်ထုတ်လုပ်ထားပါတယ်။ရာဇဝတ်ဂိုဏ်း ဇာတ်လမ်းတွေရဲ့ ထုံးစံအတိုင်း လှည့်ကွက်တွေအများကြီးနဲ့ ဇာတ်ရှိန်မြန်မြန်နဲ့ ကြည့်ရှုသူကို ဆွဲဆောင်ထားနိုင်တဲ့ ဇာတ်လမ်းမျိုး ဖြစ်ပါတယ်။မှုခင်းနဲ့ သည်းထိတ်ရင်ဖို ဇာတ်လမ်းတွေကို နှစ်သက်သူတွေနဲ့ Anya Taylor-Joy ရဲ့ ပရိသတ်တွေအတွက်တော့ လက်မလွှတ်တမ်း ကြည့်ရှုသင့်တဲ့ ၂၀၂၆ ခုနှစ်ရဲ့ ဇာတ်လမ်းတွဲသစ်တစ်ခုဖြစ်ပါတယ်။