2023 ခုနှစ်မှာ 8 ပိုင်းထဲ ပြသပြီး ထုတ်လွှင့်မှုရပ်ဆိုင်းခံခဲ့ရတဲ့Justice in the Dark ဇာတ်ကားက 2025 မှာတော့ ပရိသတ်ကြီးတို့ရှေ့ကိုပြန်ပြီးရောက်လာခဲ့ပါပြီ။ တရုတ် Danmei လောကမှာနာမည်ကြီးစာရေးဆရာမတစ်ဦးဖြစ်တဲ့ Priest ရဲ့ Silent Reading ဆိုတဲ့နာမည်ကြီးဝတ္ထုကို Live Action အဖြစ် အသက်သွင်းထားတာ ဖြစ်ပါတယ်။အဓိက သရုပ်ဆောင်တွေအဖြစ် Zhang Xincheng နဲ့ Fu Xinbo တို့ကဖေစုနဲ့ လော့ဝေ့ကျောင်းအဖြစ် ပါဝင်သရုပ်ဆောင်ထားပါတယ်။ဇာတ်လမ်းအကျဉ်းကို ပြောပြရမယ်ဆိုရင်ဖေစုက ချမ်းသာတဲ့ဥက္ကဌတစ်ယောက်ပါ။ ဒါပေမဲ့ သူ့ရဲ့ ငယ်ဘဝကအေးချမ်းနေခဲ့တာတော့ မဟုတ်ခဲ့ပါဘူး။ အဖေဖြစ်သူက သူ့ကို ရက်စက်တတ်အောင်လို့အကောင်လေးတွေကို သတ်ခိုင်းတာမျိုးတွေလုပ်ခဲ့သလို အမေဖြစ်သူအိမ်တွင်းအကြမ်းဖက်ခံရတာကိုပါ တွေ့ခဲ့ရတဲ့သူတစ်ယောက်ပါ။တစ်နေ့မှာ သူ ကျောင်းပြန်လာချိန်မှာပဲ သူ့ရဲ့အမေက ကိုယ့်ကိုယ်ကိုယ် အဆုံးစီရင်သွားခဲ့ပါတယ်။တစ်ဖက်မှာတော့ လော့ဝေ့ကျောင်းက SID ရဲ့ ရဲအရာရှိတစ်ယောက် ဖြစ်ပါတယ်။သူက အမှုလိုက်တဲ့နေရာမှာ အရမ်းတော်သလို တစ်ဖွဲ့လုံးက အားကိုးရတဲ့ခေါင်းဆောင်တစ်ယောက်ပါ။ ဖေစုနဲ့ လော့ဝေ့ကျောင်းတို့က အရင်ကတည်းကတစ်ယောက်နဲ့တစ်ယောက်သိခဲ့ကြပေမဲ့ ကြောင်နဲ့ကြွက်လို ဆက်ဆံရေးပါပဲ။တစ်နေ့ မြို့ထဲမှာ Delivery ကောင်လေးတစ်ယောက်က အသတ်ခံခဲ့ရတယ်။ကောင်လေးက အမေဖြစ်သူဆေးဖိုးအတွက် နယ်ကနေ မြို့တက်လာပြီး အလုပ်လုပ်နေတဲ့ ကောင်လေး…ရန်ဖက်မရှိတဲ့ ကောင်လေးတစ်ယောက်ပါ။ ဒီကောင်လေး အသတ်ခံရတဲ့ အမှုက SID ကိုရောက်လာပြီး လော့ဝေ့ကျောင်းတို့ ဖြေရှင်းဖို့ ဖြစ်လာရပါတယ်။ ဒီအမှုမဖြစ်ခင်အသတ်ခံရတဲ့ ကောင်လေးနဲ့ ဖေစုဟာ တွေ့ခဲ့ဖူးတာမလို့ ဖေစုကလည်း ဒီအမှုထဲမှာပါဝင်ပတ်သက်လာရပါတယ်။ အဲဒီကနေတစ်ဆင့် ဖေစုက SID က အဖွဲ့သားတွေနဲ့အမှုတွေအတူဆက်ပြီးဖော်ထုတ်ဖို့ အကြောင်းဖန်လာရပါတယ်။Delivery ကောင်လေး အသတ်ခံရတဲ့အမှုကစလို့ နောက်ဆက်တွဲအမှုတွေကကြည့်ရှုသူကို ရင်တလှပ်လှပ်ဖြစ်စေမယ့် အမှုတွဲတွေဖြစ်ပါတယ်။ အမှုတစ်ခုနဲ့တစ်ခုဟာဘယ်လိုမျိုးဆက်စပ်နေမလဲ၊ နောက်ကွယ်က ကြိုးကိုင်သူတွေက ဘယ်သူတွေဖြစ်နေမလဲ၊လော့ဝေ့ကျောင်းနဲ့ ဖေစုကရော ဒီအမှုတွေကို ဖော်ထုတ်ရင်း ဘာတွေကြုံတွေ့လာရမလဲ၊ဒီအမှုတွေကနေတစ်ဆင့် လော့ဝေ့ကျောင်းတို့ဆရာ သေဆုံးမှုနဲ့ရောဘယ်လိုသွားပတ်သက်နေမလဲဆိုတာတွေကိုတော့ ပရိသတ်ကြီးတို့ကိုယ်တိုင်ဒီကားလေးကိုကြည့်ရှုပြီး အဖြေဖော်ထုတ်လိုက်ကြပါနော်။မူရင်းဝတ္ထုဟာ တကယ့်လက်တွေ့ဘဝမှာ ဖြစ်ပျက်နေတဲ့အရာတွေကိုလက်တွေ့ဆန်ဆန် ရေးသားထားတာဖြစ်တာမလို့ ပျော်ရွှင်စရာ၊ ဝမ်းနည်းစရာ၊ရင်ခုန်စရာတွေ အများကြီးပါဝင်ပါတယ်။ Live Action ကလည်းတရုတ်ပြည်ရဲ့ဆင်ဆာစည်းမျဉ်းတွေကို ကျော်ခွပြီး မူရင်းနဲ့တူအောင်အတတ်နိုင်ဆုံး ရိုက်ကူးထားတာမလို့ မှုခင်းဇာတ်လမ်းတွဲတွေကို ကြိုက်နှစ်သက်ရင်မဖြစ်မနေကြည့်သင့်ကြောင်း Recommend လုပ်လိုက်ပါရစေ။