ကလေးတစ်ယောက်ကို ကျွေးမွေးပြုစုစောင့်ရှောက်ရတာက လွယ်တယ်လို့ထင်ပါသလား။ အဲဒီကလေးက ကိုယ့်ကလေးမဟုတ်ဘဲ တစ်ခြားသူရဲ့ကလေးဖြစ်နေတဲ့အပြင်ပြောစကားနားမထောင်တဲ့ကလေးဖြစ်နေပြန်ရင်လည်း ပြုစုစောင့်ရှောက်ရပိုခက်မှာမလား။ဒိုင်းကီချိ (Daikichi) တစ်ယောက် သူ့အဘိုးစျာပနအခမ်းအနားကြောင့် အဘိုးဖြစ်သူရဲ့အိမ်ကို ပြန်လာရင်းအသက် ၆ နှစ်အရွယ် ရင်း (Rin) လို့ခေါ်တဲ့ကလေးမလေးတစ်ယောက်ကို တွေ့သွားပြီး ဘယ်သူ့ကလေးလဲဆိုတာမေးတော့ သူ့အဘိုးရဲ့တိတ်တိတ်ပုန်းကလေးဖြစ်နေတယ်။ ဒိုင်းကီချိရဲ့မိဘကအစသူ့ဆွေမျိုးတွေက ရင်းကို သူတို့မိသားစုမျိုးရိုးရဲ့ အရှက်ရစရာတစ်ခုလို့ သတ်မှတ်ကြပြီး ဘယ်သူမှခေါ်ထားပြီး မစောင့်ရှောက်ချင်ကြဘူး။ အဲဒီမှာ ဒိုင်းကီချိက ချစ်ဖို့ကောင်းပြီး အပြစ်မရှိတဲ့ ရင်းကိုသနားသွားလို့ ခေါ်ယူကျွေးမွေးစောင့်ရှောက်ဖို့ ဆုံးဖြတ်လိုက်တာကို သူ့မိဘတွေရော သူ့ဆွေမျိုးတွေရော အသည်းအသန် တားကြပေမဲ့ ဒိုင်းကီချိကတော့ သူ့ဆုံးဖြတ်ချက်ကိုမပြင်ဘဲ ရင်းကိုခေါ်ယူစောင့်ရှောက်ပါတော့တယ်။ စစချင်းတော့ ကိုယ့်ကလေးမဟုတ်တဲ့သူကို ခေါ်ယူစောင့်ရှောက်တာကမှားသွားပြီလားလို့ လူပျိုဖြစ်တဲ့ ဒိုင်းကီချိတစ်ယောက် နောင်တရနေပေမဲ့အဆိုးထဲကအကောင်းလို့ပြောရလောက်အောင် သိပ်လိမ္မာတဲ့ ရင်းကို တဖြည်းဖြည်း ကိုယ့်သမီးလို မြင်ယောင်ပြီး သံယောဇဉ်တွယ်လာမိတော့တယ်။ဟုတ်ပါတယ်… ဇာတ်လမ်းကသိပ်ကိုရိုးရှင်းပါတယ်။လှည့်ကွက်တွေ၊ ဒရာမာအရမ်းချိုးတာတွေမပါဘဲ ကလေးတစ်ယောက် အထူးသဖြင့် တစ်ခြားသူရဲ့ကလေးကို ကျွေးမွေးပြုစုစောင့်ရှောက်နိုင်မှာလား၊ အလုံးစုံတာဝန်ယူနိုင်မှာလား၊ အဲဒီကလေးအတွက်တစ်ခါတစ်ရံ ကိုယ့်ဘဝကိုယ် အနစ်နာခံနိုင်မှာလားဆိုတာကို ရိုးရိုးရှင်းရှင်း ပုံဖော်ရိုက်ကူးပြထားတာပါ။ဒီ Usagi Drop ဇာတ်ကားက Yumi Unita ရေးတဲ့ Usagi Drop (2005-2011) Manga ကိုပြန်ရိုက်ထားတဲ့ Live-Action ဇာတ်ကားဖြစ်ပြီး Anime အဖြစ်လည်း ၂၀၁၁ ခုနှစ်မှာ ProductionI.G စတူဒီယိုကနေ ၁၁ ပိုင်းထွက်ရှိထားပါတယ်။ Usagi Drop ဇာတ်ကားရဲ့ဒါရိုက်တာ Sabu က ဒီဇာတ်ကားကိုရိုက်ကူးခဲ့တုန်းက သရုပ်ဆောင်တွေဆီက သဘာဝကျကျ သရုပ်ဆောင်မှုတွေကိုလိုချင်ခဲ့တာဆိုပြီး အစအဆုံးနီးပါး ဇာတ်ညွှန်းအသင့်မရှိဘဲ လက်တန်းရိုက်ကူးခဲ့တယ်လို့သိရပါတယ်။ Usagi Drop ကို ရိုက်ကူးပြီး ၁၄ ကြိမ်မြောက် Shanghai International Film Festivalမှာပြတော့လည်း လှိုက်လှိုက်လှဲလှဲ ချီးကျူးခံခဲ့ရတဲ့ကားကောင်းပါပဲ။အလုပ်တစ်ဖက် ကလေးတစ်ဖက်နဲ့ တိုင်ပတ်နေတဲ့ လူပျိုကြီး ဒိုင်းကီချိအဖြစ် ပေါ်လွင်အောင် သရုပ်ဆောင်ပြတဲ့သူကတစ်ခြားသူမဟုတ်ပါဘူး… ပထမဆုံး Death Note Live-Action တွေထဲမှာ L အဖြစ် သရုပ်ဆောင်ခဲ့တဲ့ Kenichi Matsuyama ပါ။ ရင်း အဖြစ် သရုပ်ဆောင်ခဲ့တဲ့ ကလေးသရုပ်ဆောင် ManaAshida က ကလေးပီပီ ချစ်စရာကောင်းလောက်အောင် Kenichi နဲ့အပြိုင် သရုပ်ဆောင်နိုင်ခဲ့လို့ အဲဒီနှစ်ကကျင်းပခဲ့တဲ့ ၅၄ ကြိမ်မြောက် Blue Ribbon Awards ပွဲမှာ Best Newcomer(အကောင်းဆုံးတက်သစ်စသရုပ်ဆောင်) ဆုကို ရရှိခဲ့ပါတယ်။