Beyond the Years ရုပ်ရှင်ဇာတ်ကားဟာ ဒါရိုက်တာ Im Kwon-taek ရဲ့ အခု ၁၀၀ မြောက် ရုပ်ရှင်ဇာတ်ကားအဖြစ် ဂုဏ်ပြုရိုက်ကူးခဲ့ခြင်းဖြစ်ပြီး Yi Cheong-junရဲ့ "The Wanderer of Seonhak-dong" အမည်ရှိ ဝတ္ထုတိုကို အခြေခံထားကာ ၂၀၀၇ ခုနှစ် တိုရွန်တို အပြည်ပြည်ဆိုင်ရာ ရုပ်ရှင်ပွဲတော်မှာ ပြသခဲ့ပါတယ်။ New Heart က မင်းသားကြီး Jo Jae Hyun၊ Moving ထဲက မင်းသားကြီး Ryu Seung Ryong၊ မင်းသမီးကြီး Oh Jung Hae တို့ အဓိက ပါဝင်ထားပါတယ်။ ဇာတ်လမ်းအကျဉ်း- ဒုံဟိုနဲ့ ဆုန်းဟွာတို့ဟာ နယ်လှည့် သီဆိုသူ အဆိုတော် ယူဘုံးရဲ့ မွေးစားခြင်းကို သီးခြားစီ ခံခဲ့ရပြီး မောင်နှမများအဖြစ် အတူတကွ ကြီးပြင်းလာခဲ့ကြတယ်။ ဒုံဟိုဟာ ဆုန်းဟွာ ချစ်ကြိုက်မိသွားပေမဲ့ အစ်မတစ်ယောက်လိုသာ သဘောထားနေရပြီးတော့ ဆုန်းဟွာကို အဆိုတော်ကောင်း တစ်ယောက်ဖြစ်လာစေချင်တဲ့ ယူဘုံးရဲ့ တွန်းအားပေးမှုတွေကို အမြဲတမ်း ရင်ဆိုင်နေခဲ့ရတယ်။ နောက်ဆုံးမှာတော့ ဒုံဟိုဟာ သည်းမခံနိုင်တော့ဘဲ အိမ်ကနေ ထွက်ခွာသွားခဲ့တယ်။ ဒါပေမဲ့လည်း ဆုန်းဟွာအပေါ် ထားရှိတဲ့ သူ့ရဲ့ ချစ်ခြင်းမေတ္တာတွေဟာ ပြောင်းလဲမသွားဘဲ ဆုန်းဟွာရဲ့ သီဆိုမှုနဲ့ ဟန်ချက်ညီညီ ပေါင်းစပ်နိုင်ရန် ဗုံကို ကျွမ်းကျင်စွာ တီးခတ်နိုင်ရန် လေ့ကျင့်ရင်း ဆုန်းဟွာကို အသည်းအသန် ပြန်လိုက်ရှာနေမိခဲ့တယ်။ ဒီဇာတ်ကားလေးကတော့ (Pansori - ကိုရီးယား ရိုးရာ ဇာတ်ကြောင်းပြော တေးဂီတ အမျိုးအစား) ပါရမီအတွက် သူ့ရဲ့ ဘဝနှင့် အချစ်ကို ပေးဆပ်ခဲ့သူ ဆုန်းဟွာနဲ့ သူ့ကို ချစ်မြတ်နိုးဖို့အတွက်သာ ဘဝတစ်ခုလုံးကို ရင်းနှီးပေးဆပ်ခဲ့သူ ဒုံဟိုတို့ရဲ့ ရင်ထဲထိရှစေမဲ့ အချစ်ဇာတ်လမ်းတစ်ပုဒ် ဖြစ်တာကြောင့် ကြည့်ရှုခံစားကြပါဦးလို့ တိုက်တွန်းလိုက်ပါတယ်။