ဒီတစ်ခါမှာတော့ ၂၀၁၉ ခုနှစ်မှာ ထွက်ရှိခဲ့ပြီး ဝက်ဝက်ကွဲ ရယ်ရတဲ့ "The Dude in Me" ဆိုတဲ့ Action, Comedy ဇာတ်ကားလေးနဲ့ မိတ်ဆက်ပေးပါမယ်။ ပရိသတ်တို့နဲ့ ရင်းနှီးပြီးသား သရုပ်ဆောင်တွေဖြစ်တဲ့ မင်းသားကြီး Park Sung-Woong, B1A4 က အချောလေး Jin Young, မင်းသမီးကြီး Ra Mi-Ran နဲ့ Lee Soo-Min တို့ အဓိက ပါဝင်ထားပြီး တခြားသရုပ်ဆောင်များလည်း မြိုင်မြိုင်ဆိုင်ဆိုင် အားဖြည့်ထားပါတယ်။ ဇာတ်လမ်းလေးကတော့ .. ဂျန်ဖန်းဆူ (Park Sung-Woong) ဆိုတာက နာမည်ကြားရုံနဲ့ လူမိုက်လောကမှာ ဒူးတုန်ရတဲ့အထိ အောင်မြင်တဲ့ စီးပွားရေးလုပ်ငန်းရှင် တစ်ဦးဖြစ်ပါတယ်။ တစ်နေ့မှာတော့ မတော်တဆမှုတစ်ခုဖြစ်ခဲ့ပြီး .. ကျောင်းမှာ အမြဲအနိုင်ကျင့်ခံနေရတဲ့ ဒုံဟျွန်း (Jin Young) ဆိုတဲ့ အဝလွန်ကျောင်းသားလေးနဲ့ ဝိညာဥ်ချင်း လဲသွားပါတော့တယ် ။ ဒီလိုနဲ့ လူမိုက်ဂိုဏ်းစတားကြီးရဲ့ ဝိညာဉ်က စိတ်နုနယ်တဲ့ ကျောင်းသားလေးရဲ့ ကိုယ်ထဲကို ရောက်သွားတဲ့အခါမှာတော့ ..အဝလွန်နေတဲ့ ကိုယ်အလေးချိန်ကို လျှော့ချပြီးတဲ့နောက် ကျောင်းမှာ အနိုင်ကျင့်သူတွေကို ပညာပြန်ပေးပုံတွေကို ကြည့်ရတာလည်း အားရကျေနပ်ဖို့ကောင်းပြီး တစ်ဖက်မှာလည်း ဒုံဟျွန်းရဲ့ အတန်းဖော်ဖြစ်တဲ့ ကျောင်းသူလေး ဟျွန်းဂျောင်းရဲ့ အမေဟာ ဂိုဏ်းစတားကြီးရဲ့ ရည်းစားဟောင်းဖြစ်နေတဲ့အပြင် အဲဒီကျောင်းသူလေးကပါ သူ့သမီးအရင်းဖြစ်နေတဲ့အခါမှာတော့ .. ဒီကားလေးက အစကနေ အဆုံးထိ ပျင်းစရာတစ်ချက်လေးမှ မရှိအောင် ဟာသတွေ၊ အက်ရှင်တွေနဲ့ ရသစုံစုံပါဝင်တဲ့ကားကောင်းလေး ဖြစ်ပါတယ်။ မိသားစုချစ်ခြင်းတရားနဲ့ မေတ္တာရဲ့ နက်ရှိုင်းတဲ့အဓိပ္ပါယ်တွေဟာ ငွေထက် ပိုတန်ဖိုးရှိကြောင်းကို ပုံဖော်ပြသထားတာမို့လို့ ကြည့်လို့ တန်တဲ့ကားဖြစ်ကြောင်း ညွှန်းဆိုလိုက်ပါရစေ။