အမ်ပိုရီယမ် ဆိုတဲ့ နယ်မြို့လေးက တောတောင်တွေ အုံ့မှိုင်းပြီးတော့ သဘာဝနဲ့ နီးစပ်တဲ့ တောမြို့လေးတစ်ခုပါ။ စာရေးဆရာ ဝီလ် ရယ်၊ ဇနီး အက်ဗလင် ရယ်၊ သမီးဖြစ်သူတို့က မြို့ကြီးကနေပြောင်းရွှေ့ပြီးတော့ အမ်ပိုရီယမ်မြို့လေးဆီကို ပြောင်းလာဖို့အတွက် ကားလေးနဲ့ ခရီးထွက်လာပါတယ်။ သမီးဖြစ်သူက အထက်တန်းကျောင်းတက်ရင်းနဲ့ မတော်တဆကိုယ်ဝန်ရသွားခဲ့တာကြောင့် စိတ်ကို ဖေးမပေးဖို့ရော၊ စိတ်ပြေလက်ပျောက်လည်းဖြစ်စေဖို့အတွက် လူသွားလူလာ နည်းပေမဲ့ ရှုခင်းလှတဲ့ လမ်းကနေ ကားလေးတစ်စီးနဲ့ခရီးထွက်ခဲ့ပါတော့တယ်။ ဒီလိုနဲ့ စခန်းချတဲ့ နေရာတစ်ခုအရောက်မှာတော့ သူတို့လိုပဲ စခန်းချ ခရီးထွက်လာတဲ့ စတိဗ်တို့ မိသားစုနဲ့တွေ့ပြီး မိတ်ဆွေဖွဲ့ရင်း မီးပုံပွဲလေး လုပ်ဖြစ်ခဲ့ကြတယ်။ မီးပုံပွဲမှာရောက်တတ်ရာရာပြောကြရင်းနဲ့ စတိဗ်ရဲ့ သမီးဖြစ်သူက အဲဒီဒေသတဝိုက်မှာ ကိုယ်ဝန်ဆောင်တွေကို လူစားလဲတတ်တဲ့ တံတားတစ်ခုအကြောင်း ပြောဖြစ်ခဲ့ပါတယ်။ စတိဗ်ကတော့အစွဲအလမ်းကြီးတဲ့သူဖြစ်လို့ နောက်တစ်နေ့မနက်မှာ ဝီလ်ကို တံတားကူးစရာမလိုတဲ့ လမ်းက သွားဖို့ပြောခဲ့ပေမဲ့ ဝီလ်ကတော့ အယုံအကြည်မရှိတဲ့အတွက်သွားနေကျလမ်းအတိုင်းပဲဆက်သွားခဲ့ပါတယ်။ ဒီတံတားလေးက စတိဗ်သတိပေးသလိုပဲ တကယ် လျှို့ဝှက်နက်နဲတဲ့ အရာတွေနဲ့ ပြည့်နေတာလား၊ ဒါမှမဟုတ် တစ်ယောက်ယောက်ရဲ့ ပရောဂကြောင့်ပဲလား။ သူတို့ရဲ့ ခရီးစဥ်လေးကရောဘယ်လိုဆက်ဖြစ်သွားမလဲဆိုတာ ဒီရုပ်ရှင်ထဲမှာ စိတ်ဝင်စားဖွယ်ကြည့်ရှု ကြရမှာပါ။