ဒီကားဟာ ၂၀၂၆ ခုနှစ် ဖေဖော်ဝါရီလပိုင်းကမှ Digital Platform တွေမှာ ထွက်ရှိထားတဲ့ အမေရိကန် စိတ်ပညာဂမ္ဘီရ ထိတ်လန့်စရာ (Psychological Horror / Thriller) ရုပ်ရှင်ကားသစ် ဖြစ်ပါတယ်။ ဒါရိုက်တာ Mico Montes က ရိုက်ကူးထားပြီး တကယ့်ကို ထူးထူးဆန်းဆန်းနဲ့ စိတ်ကျဉ်းကျပ်စရာ ကောင်းတဲ့ အငွေ့အသက်မျိုး ပေးမယ့် Anthology (ဇာတ်လမ်းတိုပေါင်းချုပ်) ပုံစံ ကားလေးပါ။ဇာတ်လမ်းက ပုံမှန်ကုထုံးတွေနဲ့မတူဘဲ ထူးခြားတဲ့ စိစစ်မှုတွေလုပ်တတ်တဲ့ စိတ်ပညာရှင် ဒေါက်တာ ဟီဒိုနီယာ (Dr. Hedonia) ရဲ့ ကုသဆောင်ထဲကနေ စတင်ပါတယ်။ သူက အတိတ်မှာ ဆိုးဆိုးရွားရွား စိတ်ဒဏ်ရာတွေ အသီးသီး ခံစားခဲ့ရတဲ့ လူစိမ်း ၅ ယောက်ကို စုစည်းပြီး အုပ်စုလိုက် စကားပြောကုထုံး (Group Therapy) တစ်ခု ပြုလုပ်ပေးပါတယ်။ ရည်ရွယ်ချက်ကတော့ လုံခြုံစိတ်ချရတဲ့ ပတ်ဝန်းကျင်တစ်ခုမှာ ကိုယ်ကြုံခဲ့ရတဲ့ ထိတ်လန့်စရာ အတွေ့အကြုံတွေကို ပွင့်ပွင့်လင်းလင်း ရင်ဖွင့်ပြီး အတူတူ ကုစားကြဖို့ပေါ့။ကုထုံးပွဲ စတင်လိုက်တဲ့အခါ လူနာတစ်ယောက်ချင်းစီက သူတို့ ကြုံခဲ့ရတဲ့ ကြောက်မက်ဖွယ် အိပ်မက်ဆိုးတွေကို ပြန်ပြောပြကြပြီး ဇာတ်ကားက သူတို့ပြောပြတဲ့ အတိတ်ဖြစ်ရပ်တွေကို ဇာတ်လမ်းတိုလေးတွေအနေနဲ့ ချပြသွားပါတယ်။ သူတို့တစ်ယောက်ချင်းစီရဲ့ မတူညီတဲ့ ဒုက္ခတွေကို နားထောင်ရင်းနဲ့ ဆွေးနွေးပွဲ အရှိန်တက်လာတဲ့အခါမှာတော့ အခန်းထဲကလူတွေဟာ ထူးဆန်းတဲ့ သံသယတစ်ခု ဝင်လာကြပါတယ်။ အဲဒါကတော့ သူတို့ ကြုံတွေ့ခဲ့ရတဲ့ ဖြစ်ရပ်ဆိုးတွေဟာ သာမန်တိုက်ဆိုင်မှု သက်သက်မဟုတ်ဘဲ နောက်ကွယ်က လျှို့ဝှက်ချက်တစ်ခုနဲ့ အကုန်လုံးက ချိတ်ဆက်နေတယ်ဆိုတာကို ရိပ်မိသွားကြတဲ့ အခါမှာတော့... အနာဂတ်အတွက် ကုစားစရာ ကုထုံးပွဲကြီးဟာ တစ်ယောက်နဲ့တစ်ယောက် သံသယတွေ၊ ကြောက်ရွံ့မှုတွေ ပြည့်နှက်နေတဲ့ အသက်လုပွဲကြီးတစ်ခုအဖြစ် ဘယ်လိုပြောင်းလဲသွားမလဲဆိုတာကို ရင်တမမနဲ့ ကြည့်ရှုရမှာ ဖြစ်ပါတယ်။ဒီကားက ခုတ်ဖြတ်စတိုင် (Slasher) ကားတွေလို သွေးထွက်သံယို သက်သက်တင် မဟုတ်ဘဲ လူ့စိတ်ရဲ့ နက်ရှိုင်းတဲ့ ဒဏ်ရာတွေ၊ အကြောက်တရားတွေကို ပုံဖော်ထားတာပါ။ ဇာတ်ကားကြာချိန် ၂ နာရီခွဲနီးပါး ရှိတာမို့လို့ နည်းနည်းတော့ အေးအေးဆေးဆေး ကြည့်ရမှာ ဖြစ်ပေမယ့် တစ်ခန်းချင်းစီကပေးတဲ့ ထိတ်လန့်စရာ အငွေ့အသက်တွေက တကယ့်ကို ရင်ဖိုစရာ ကောင်းပါတယ်။အထူးသဖြင့် Psychological Thriller တွေနဲ့ Twist ပါတဲ့ကားမျိုးကို ကြိုက်တဲ့သူတွေအတွက် အကြိုက်တွေ့စေမယ့် ဇာတ်ကားမျိုး ဖြစ်ပါတယ်။