Charli XCX သရုပ်ဆောင်ထားတဲ့ anti-romantic ဟာသဇာတ်လမ်းတစ်ပုဒ်နဲ့ မိတ်ဆက်ပေးပါရစေ။Bethany ( Charli XCX ) က သူ့ချစ်သူကောင်လေး Rob နဲ့ အပန်းဖြေခရီးထွက်လာတဲ့ ဗြိတိန်ခရီးသွားတစ်ယောက်ဖြစ်တယ်။တကယ်တော့ Rob က Bethany ကို သူတို့မိသားစုပိုင်လက်စွပ်နဲ့ လက်ထပ်ခွင့်တောင်းချင်လို့ အပန်းဖြေခရီးကို ခေါ်လာတာပါ။ဒါပေမဲ့ Bethany က ရေရှည်လက်တွဲရတာမျိုးကို ကြောက်တော့ လက်ထပ်ခွင့်တောင်းခံရတာကို ရှောင်ဖို့ သူတို့ရဲ့ ခရီးကို ရိုမန့်တစ်ဆန်တဲ့ ပဲရစ်ကနေ ပိုလန် ဝါစောကို တမင်လျှိ့ဝှက်ပြီးပြောင်းလိုက်ပါတယ်။ပြဿနာက Rob အိပ်နေတဲ့အချိန် Bethany က သူ့ရဲ့ငယ်သူငယ်ချင်း Nel ဆီကို ခိုးပြီးထွက်သွားတာပဲ။သူတို့သူငယ်ချင်းနှစ်ယောက်က နှစ်ယောက် ဆုံတိုင်း ကမ္ဘာပေါ်က တစ်နေရာရာမှာ မီးတောင်ပေါက်ကွဲတတ်တယ်လို ထူးထူးဆန်းဆန်း စနောက်ပြီး ယုံနေကြတာရှိတယ်။ဒါပေမဲ့ ဖြစ်ချင်ရင်တော့ ရုတ်တရက်ကြီး အီတလီက တကယ့်မီးတောင်တစ်ခု ထပေါက်ပြီး လေယာဉ်ခရီးစဥ်တွေ အကုန်ရပ်ကုန်တာမို့ သူတို့တွေ ပိုလန်မှာပဲ ပိတ်မိသွားကြပါတယ်။ဒီလိုနဲ့ Bethany တစ်ယောက် သူ့ရဲ့ရည်းစား Rob ဆီကနေ ဘယ်လိုတွေ ဆင်ခြေအမျိုးမျိုးနဲ့ လျစ်လျူရှုပြီး ထွက်ပြေးနေဦးမလဲ၊ အဆုံးသတ်မှာ ဘယ်လိုအသိတရားတွေကိုရင်ဆိုင်ရမလဲဆိုတာကိုတော့ ဒီဇာတ်လမ်းထဲမှာပဲ ဆက်လက်ကြည့်ရှုလိုက်ရအောင်ပါ။