ဒီရက်ပိုင်း ရုပ်ရှင်အဟောင်းလေးတွေ ပြန်ကြည့်ဖြစ်ရင်း Arabesque (1966) ကို သွားကြည့်ဖြစ်တယ်။ ဒါရိုက်တာ Stanley Donen ရိုက်ထားတာဆိုတော့ သူ့ရဲ့ နာမည်ကြီး Charade (1963) နဲ့အငွေ့အသက် တော်တော်လေး ဆင်တယ်ဗျ။ မင်းသားကြီး Gregory Peck နဲ့ အလှဘုရင်မကြီး Sophia Loren တို့ ပါထားတာဆိုတော့ စတိုင်လ်ပိုင်းကတော့ ပြောစရာမလိုအောင်ကိုလန်းပါတယ်။Gregory Peck က အမေရိကန်ကနေ လန်ဒန်ကို ရောက်လာတဲ့ ရှေးဟောင်းအီဂျစ်စာပေ ပါမောက္ခ ဒေးဗစ်ပေါလော့ခ် ပေါ့။ သူက အရှေ့အလယ်ပိုင်း ဝန်ကြီးချုပ်တစ်ယောက်ရဲ့အကူအညီတောင်းမှုနဲ့ လျှို့ဝှက်ကုဒ်တစ်ခုကို ဖော်ထုတ်ဖို့ ကြိုးစားရင်း လူဆိုးတွေ၊ သူလျှိုတွေကြားထဲ မတော်တဆ ရောက်သွားရော။ အဲဒီမှာ လျှို့ဝှက်ဆန်းကြယ်တဲ့ ယာစမင် (SophiaLoren) နဲ့ တွေ့ပြီး နှစ်ယောက်သား ပြေးကြလွှားကြနဲ့ ဇာတ်လမ်းဆင်ထားတာပါ။ဒီကားမှာ အကြိုက်ဆုံးကတော့ ကင်မရာထောင့်ချိုးတွေပဲ။ တော်တော်လေး ဆန်းတယ်။ မှန်တွေ၊ ရေပြင်တွေကနေ အလင်းပြန်တဲ့ ပုံရိပ်တွေကို သုံးသွားတာ ၆၀ စတိုင်လ် (Psychedelic vibes)အပြည့်ပဲ။ မြင်ကွင်းတိုင်းက အနုပညာဆန်ဆန်လေးနဲ့ ကြည့်ရတာ မျက်စိပသာဒ အရမ်းဖြစ်တယ်။Gregory Peck ရဲ့ တည်တည်ငြိမ်ငြိမ်နဲ့ ဟာသလုပ်သွားတဲ့ ပုံစံလေးတွေ သဘောကျတယ်။ Sophia Loren ကတော့ ပြောစရာမလိုဘူး၊ အရမ်းကို လှတာ။ ဇာတ်ကားထဲမှာ သူဝတ်သွားတဲ့ အဝတ်အစားတွေဆို Christian Dior ကိုယ်တိုင် ချုပ်ပေးထားတာတဲ့။ ဝတ်စုံတွေကြည့်ရတာတင် တန်နေပြီ။Henry Mancini တီးထားတာဆိုတော့ ဇာတ်ကားရဲ့ ရိုမန်တစ်ဆန်ဆန်နဲ့ သည်းထိတ်ရင်ဖို ဖီလင်ကို ပိုပြီး မိသွားစေတယ်။Arabesque က အခုခေတ် သူလျှိုကားတွေလို တအားကြီး စီရီးယက်စ်ဖြစ်ပြီး အက်ရှင်ကြမ်းတဲ့ ကားမျိုးတော့ မဟုတ်ဘူး။ ဒါပေမဲ့ ၆၀ ပြည့်လွန်နှစ်တွေရဲ့ စတိုင်လ်၊ ဖက်ရှင်၊ အချစ်နဲ့ဟာသလေးတွေ ရောထားတဲ့ ပေါ့ပေါ့ပါးပါး ဖျော်ဖြေရေး ကားကောင်းလေးတစ်ကားပါ။ ရုပ်ရှင်အဟောင်းလေးတွေ ကြိုက်တတ်တဲ့သူတွေ၊ အထူးသဖြင့် Hitchcock စတိုင်သူလျှိုကားလေးတွေ သဘောကျရင်တော့ အချိန်ပေးပြီး ကြည့်သင့်တဲ့ ကားလေးပါလို့ ညွှန်းပေးလိုက်ပါတယ်ခင်ဗျာ။