Where to Land FHD

Where to Land

Comedy Drama FHD 2025-09-12 6 75 Min

၂၀၂၅ ခုနှစ်မှာ ထွက်ရှိထားတဲ့ "Where to Land" ဇာတ်ကားဟာ ဒါရိုက်တာ Hal Hartley ရဲ့ လက်ရာဖြစ်ပြီး ဘဝရဲ့ အလှည့်အပြောင်းတွေကို ဟာသလေးနှောပြီး ရိုက်ကူးထားတဲ့ ရုပ်ရှင်တစ်ကားဖြစ်ပါတယ်။ ဒီဇာတ်လမ်းက အသက် ၅၈ နှစ်အရွယ်ရှိပြီဖြစ်တဲ့ Joe Fulton (Bill Sage သရုပ်ဆောင်ထားပါတယ်)ဆိုတဲ့ နာမည်ကြီး ဒါရိုက်တာတစ်ယောက်အကြောင်းပါ။ သူက အရင်က "Romantic Comedy" ကားတွေရိုက်ပြီး အောင်မြင်ခဲ့သူပေါ့။ ဒါပေမဲ့ အသက်အရွယ်ရလာတဲ့အခါမှာ သူက အလုပ်တွေနားပြီး ရိုးရှင်းတဲ့ဘဝကို ဖြတ်သန်းချင်လာတယ်။စိတ်ကူးပေါက်တာနဲ့ သူက ဘာလုပ်လဲဆိုတော့ သူ့အိမ်နားက သင်္ချိုင်းမှာ မြေပြင်ထိန်းသိမ်းရေးဝန်ထမ်းအဖြစ်အလုပ်ဝင်လျှောက်ပါလေရော။ အဲ့ဒီအချိန်မှာပဲ သူက အနာဂတ်အတွက် ကြိုတင်ပြင်ဆင်တဲ့အနေနဲ့ ရှေ့နေနဲ့တွေ့ပြီး "သေတမ်းစာ" ရေးဖို့ လုပ်တာပေါ့။သူ့ရဲ့ ချစ်သူကောင်မလေး ရုပ်ရှင်မင်းသမီး Muriel က Joe တစ်ယောက် သင်္ချိုင်းမှာ အလုပ်လုပ်ဖို့ပြင်နေတာရယ်၊ သေတမ်းစာ ရေးနေတာရယ်ကို သိသွားတဲ့အခါ... "သူ့ချစ်သူ Joe တစ်ယောက် ရောဂါသည်းပြီး သေခါနီးနေပြီ" လို့ ထင်ယောင်ထင်မှား ဖြစ်သွားပါတယ်။အဲ့ဒီသတင်းက ကောလာဟလအဖြစ်နဲ့ သူ့ရဲ့ အမျိုးတွေ၊ သူငယ်ချင်းတွေကြားထဲ အကုန်ပျံ့သွားပါတော့တယ်။ အားလုံးက Joe သေတော့မယ်အမှတ်နဲ့ သူ့အိမ်ကို တအုန်းအုန်း ရောက်လာကြပြီး "နောက်ဆုံးနှုတ်ဆက်ပွဲ" တွေလုပ်ကြ၊ ဝမ်းနည်းကြနဲ့ တလွဲတချော်တွေ ဖြစ်ကုန်တာကို ဟာသနှောပြီး ရိုက်ပြထားတာပါ။သေခြင်းတရားနဲ့ ဘဝအဓိပ္ပာယ်ကို အရမ်းကြီး မလေးလံစေဘဲ "ငါတို့ တကယ်တန်ဖိုးထားတာ ဘာလဲ" ဆိုတာကို ပြန်စဉ်းစားမိစေတဲ့ဇာတ်ကားပါ။ Bill Sage အပြင် နာမည်ကြီးမင်းသမီး Edie Falco လည်း ပါဝင်ထားလို့ သရုပ်ဆောင်ပိုင်းကတော့ ပြောစရာမလိုအောင် ကောင်းပါတယ်။ ဒါရိုက်တာ Hal Hartley ရဲ့ ထူးခြားတဲ့ စကားပြောဟန်တွေနဲ့ ရိုက်ချက်တွေကိုလည်း ခံစားရမှာပါ။ဒီကားက ဘဝမှာ အပြောင်းအလဲတစ်ခုခု လုပ်ချင်နေတဲ့သူတွေ၊ ဒါမှမဟုတ် အသက်အရွယ်တစ်ခုရောက်လာလို့ ကိုယ့်ကိုယ်ကိုယ် ပြန်သုံးသပ်နေတဲ့သူတွေ ကြည့်သင့်တဲ့ Comedy Drama ကားကောင်းတစ်ကား ဖြစ်ပါတယ်။