"Pfau - Bin ich echt?" (Peacock) ကတော့ ၂၀၂၄ ခုနှစ်က ထွက်ရှိခဲ့တဲ့ ဩစတြီးယား-ဂျာမန် ပူးတွဲထုတ်လုပ်တဲ့ လူမှုရေးထေ့လုံးတွေနဲ့ဟာသဇာတ်ကားဖြစ်ပါတယ်။ Bernhard Wenger က ရေးသားဒါရိုက်တာလုပ်ထားပြီး သူ့ရဲ့ပထမဆုံးရုပ်ရှင်ဇာတ်ကားလည်း ဖြစ်ပါတယ်။ လူသားတွေရဲ့ကိုယ်ပိုင်လက္ခဏာနဲ့ အစစ်အမှန်ဖြစ်မှုဆိုင်ရာ မေးခွန်းတွေကို နက်ရှိုင်းစွာစူးစမ်းထားတဲ့ဇာတ်ကားတစ်ကား ဖြစ်ပါတယ်။ Matthias ဟာ My Companion လူငှားရမ်းရေးဝန်ဆောင်မှုလုပ်ငန်းတစ်ခုမှာ အလုပ်လုပ်ကိုင်နေသူ ဖြစ်ပြီး လိုအပ်တဲ့ဝန်ဆောင်မှုပေါ် မူတည်ကာ ယဉ်ကျေးတဲ့ရည်းစား၊ ပြည့်စုံတဲ့သား ဒါမှမဟုတ် စကားများဖော်များဖက်အဖြစ် ဘယ်ဇာတ်ကောင်မျိုးကိုမဆို အပြည့်အဝ သရုပ်ဆောင်နိုင်သူ ဖြစ်ပါတယ်။ သူများအတွက် ဇာတ်ကောင်တွေကို ကောင်းစွာ သရုပ်ဖော်နိုင်ပေမယ့်လည်း သူ့ကိုယ်ပိုင်ဘဝမှာတော့ သူကိုယ်တိုင်ဖြစ်တည်မှုရဲ့အဓိပ္ပာယ်ကိုရှာဖွေရင်း ဒုက္ခရောက်နေသူ ဖြစ်ပါတယ်။သူ့ချစ်သူ Sophia က သူ့ကို စွန့်ခွာသွားတဲ့အခါ Matthias ရဲ့အမြင်လှပတဲ့ဘဝဟာ အဓိပ္ပာယ်မရှိဘဲကမောက်ကမအခြေအနေကို ရောက်ရှိသွားပြီး သူ့ရဲ့ကိုယ်ပိုင်လက္ခဏာအစစ်အမှန်ကို ရှာဖွေဖို့ ကြိုးပမ်းရပါတော့တယ်။ ရုပ်ရှင်ရဲ့ခေါင်းစဉ် "Pfau" (Peacock - ဒေါင်းငှက်) ဟာ အပြင်ပန်းလှပမှုနဲ့ကြွားဝါမှု၊ အတွင်းစိတ်မှာ အဓိပ္ပာယ်မရှိတဲ့ဗလာဖြစ်နေမှုကို ရည်ညွှန်းပါတယ်။ ဒါရိုက်တာ Wenger ရဲ့အဆိုအရ ဒေါင်းငှက်ဟာ အလှအပကြွားဝါနိုင်ပေမယ့်လည်း ကောင်းစွာ မပျံနိုင်တာ၊ ဆိုးရွားတဲ့အသံသာထွက်တာစတဲ့ ကန့်သတ်ချက်တွေရှိပြီး Matthias ရဲ့ အပြင်ပန်းကောင်းမွန်ပြီး အတွင်းစိတ်မှာအစစ်အမှန်မရှိခြင်းရဲ့သင်္ကေတအဖြစ် ရည်ညွှန်းထားပါတယ်။ ဗင်းနစ် ရုပ်ရှင်ပွဲတော်အပါအဝင် ကမ္ဘာတစ်ဝှမ်းက ရုပ်ရှင်ပွဲတော်ပေါင်းများစွာမှာ ပြသခံခဲ့ရပြီး၊ဩစတြီးယားနိုင်ငံရဲ့ ၉၈ ကြိမ်မြောက် Academy Awards (အော်စကာဆု) ရဲ့ Best International Feature Film ဆုအတွက် တင်သွင်းခံထားရတဲ့ ဇာတ်ကားဖြစ်ပါတယ်။ အဓိကသရုပ်ဆောင် Albrecht Schuch ကတော့ အကောင်းဆုံးသရုပ်ဆောင်ဆုကို ရရှိခဲ့ပါတယ်။ Pfau - Bin ich echt? ဟာ လူမှုအသိုင်းအဝိုင်းရဲ့မျက်နှာစာတွေမှာ ဝင်ဆန့်ဖို့ ကြိုးစားရင်း ကိုယ့်ကိုယ်ကိုယ် ပျောက်ဆုံးသွားတတ်တဲ့ လူသားတွေရဲ့သဘောသဘာ၀ကို ထောက်ပြနေတဲ့ ဇာတ်ကားလည်း ဖြစ်ပါတယ်။